Piden 28 anos de cárcere para o acusado de matar unha muller en Oza-Cesuras

Ao longo da mañá foron seleccionando na sección primeira da Audiencia Provincial os nove membros do xurado popular que serán os encargados de xulgar un home acusado de matar unha muller, á que coñecía, dun disparo na cabeza no concello coruñés de Oza-Cesuras, en xaneiro do 2021.

"O meu cliente non é o autor material do disparo. Aparte do delito de asasinato estase xulgando tamén un delito de tenza ilícita de armase outro de violación de morada", explica Rubén Veiga, o avogado da defensa.

A defensa mantén que nunha houbo unha inspección homicida para atentar contra a vítima. "Entendemos que si é responsable de entrar nesa casa coa intención de ir roubar, pero que foi un terceiro, ao que identificamos, o que fixo o disparo fatal polo que faleceu a vítima", engade Veiga.

Porén, desde o primeiro momento da investigación, a Garda Civil desbotou a posibilidade de que unha terceira persoa participase no asasinato. As acusacións, pública e particular, tamén o teñen claro. Consideran o investigado autor dos feitos.

"A Fiscalía pide para el un total de 28 anos de cadea, a acusación particular solicita a prisión permanente revisable e a defensa que sexa condenado por unha tentativa de roubo con violencia en casa habitada, entre dous e cinco anos de cadea", explica a defensa.

Está previsto que o xuízo se prolongue durante dúas semanas e é probable que o procesado declare ao final da proba testifical.

Cronoloxía do crime

O crime produciuse o 17 de xaneiro de 2021 pero para contextualizalo hai que remontarse a dous anos antes. O viúvo da vítima, Pablo, e a muller do presunto asasino, Sandra, traballaban na mesma empresa. Mantiñan unha estreita relación. As súas parellas descubríronos e, segundo o viúvo, decidiron poñer fin a ese coqueteo.

A partir de aí a relación laboral entre ambos complicouse ata o punto en que Sandra denunciouno por acoso. A compañía abriu unha investigación en novembro de 2020 e ela pediu unha baixa por ansiedade.

O 17 de xaneiro de 2021, supostamente Alberto, o home de Sandra, non se sabe se movido polos celos desa relación pasada da súa muller co xefe ou o desexo de vinganza polo acoso laboral que denunciara, colleu o coche. Aparcou a uns 700 metros da casa da vítima e do seu home na parroquia de Porzomillos.

Cristina, de 33 anos, estaba soa e convalecente dunha cirurxía. Alberto levaba unha pistola e unha mochila con grillóns, unha cadea metálica, cadeados e munición.

A hipótese dos investigadores é que o seu obxectivo era Pablo, pero non estaba na casa. O presunto asasino entrou na vivenda escachando unha fiestra. A vítima ao velo intentou fuxir pero disparoulle na caluga e matouna.

O presunto asasino foxe saltando o valo da casa e lesionase nunha perna. Os veciños que escoitaron os berros da vítima e vírono fuxir alertan á Garda Civil. Localizárono agochado nun monte próximo. Cando o detiveron sufriu unha parada cardiorrespiratoria e tivo que ser ingresado no hospital.

Nas proximidades localizaron semienterrada a mochila con todo o material que levaba. O acusado, Alberto, mantivo inicialmente a versión de que entrara a roubar na vivenda e que outra persoa lle disparara á vítima.