Os gandeiros, desconformes coas primeiras propostas da industria para renovar os contratos do leite

Tras anos sen apenas movementos, volven as negociacións entre a industria e os produtores para renovar os contratos do leite, que vencen a finais de marzo, pero os gandeiros din que as ofertas non son boas e seguen sen cubrir os custos de produción.

"Recibimos ofertas de 32 ou 34 céntimos, algunha de 37 céntimos, pero a todas luces insuficientes. Recoñéceno cando cho veñen ofrecer, pero ou asinas ou asinas, non hai negociación posible".

Quéixanse de que as industrias os ameazan con non recollerlles o leite e moitos cren que deberían negarse a asinar.

"Deberiamos negarnos a firmar eses contratos abusivos. Se somos un, igual nos veñen ameazando, como fan algúns con non recollernos o leite, pero se somos moitos a cousa cambia".

Din que os custos de produción seguen aumentando sen parar e que as perdas son insostibles.

"Hai un ano pagabamos o diésel agrícola a 57 céntimos e agora estamos nun euro. Os pensos subiron en xaneiro 35 euros por tonelada. O plástico dos silos estaba en 70 euros a bobina e agora en 105. A luz: en novembro pagamos 1.000 euros, en decembro 1.400 e agora xa estamos tremendo".

"Esta granxa familiar con 68 vacas perdeu uns 25.000 euros nos últimos seis meses".

Subliñan que o prezo medio que cobran polo litro de leite está nuns 35 céntimos e que os custos superan xa os 40.