Negocios da zona vella de Santiago perden vendas por unha avaría no cobro con tarxeta
Negocios da zona vella de Santiago perden vendas por unha avaría no cobro con tarxeta
A caída do sistema GPRS na rúa do Franco e noutras próximas inutilizou o pagamento por esta vía
O problema persistiu durante a fin de semana máis concorrida do verán en Compostela
Unha avaría no sistema GPRS que utilizan os terminais TPV para o cobro con tarxetas inutilizou estes aparellos en moitos negocios da zona vella de Santiago, ateigados de turistas nesta época do ano.
Comerciantes e hostaleiros da rúa do Franco e das adxacentes tiveron que buscar alternativas para manter as vendas. Algúns, como José Manuel González, "tivemos a sorte de poder enviar algúns clientes a outra das nosas tendas que tiña wifi, e si podía cobrar, pero non é moi operativo".
Outros, como Carlos Rodríguez, conseguiron que "algúns clientes nos fixeran transferencia, outros foron ao caixeiro.... pero aínda así moitas vendas perdéronse".
E as perdas, á espera de concretalas comparando o volume de negocio destes dous días con xornadas previas, non son leves. González calcula que perderon "entre 5.000 e 6.000 euros". Rodríguez cifra a perda "entre un 20 e un 30 por cento das vendas habituais".
Na actualidade a maior parte das transaccións realízanse con tarxeta. Segundo datos do Banco de España, no último ano esta modalidade de pagamento medrou case un 30 por cento. As entidades bancarias e compañías telefónicas enfróntanse polo tanto ás reclamacións dos comerciantes, que xa iniciaron os trámites para pedir un resarcimento.
Esta mañá aínda había certos problemas con algúns dos pagamentos, aínda que a maioría dos comercios xa conseguiran solucionar as dificultades.
