Desconvocada a folga do transporte de viaxeiros por estrada en Galicia

Os traballadores refrendaron esta noite o preacordo acadado polos sindicatos e a patronal do transporte de viaxeiros por estrada nunha reunión celebrada este sábado, baixo a mediación do Consello Galego de Relacións Laborais.

O resultado, en todo caso, foi moi axustado. A favor do acordo votou o 51,15 % dos traballadores, en contra o 44,95 %, cunha abstención do 3,9 %. O preacordo, que permite desconvocar a folga, que ía empezar ás 00.00 horas do luns, recibiu o apoio maioritario nas asembleas de Vigo, Santiago, A Coruña e Lugo. En cambio, foi rexeitado en Pontevedra, Ourense e Ferrol.

Segundo transcendeu, o acordo entre patronal e sindicatos recolle só cuestións económicas. Os traballadores recuperarán este ano poder adquisitivo cun aumento do 12,3 % e o ano que vén os salarios actualizaranse de acordo ao IPC.

Os sindicatos indican que a proposta que votaron as asembleas incluía manter aberta a mesa galega co fin de seguir negociando, unha cuestión que consideran importante xa que "quedan moitos flocos" sobre outras cuestións, máis aló da económica.

Quedan, entre outras, aspectos como a xornada laboral, descansos, aspectos relacionados cos acompañantes dos autobuses e a mellora do servizo.