Milleiros de persoas volven pedir a dimisión de Mazón dous meses despois da DINA
Milleiros de persoas volven pedir a dimisión de Mazón dous meses despois da DINA
É a terceira protesta contra a xestión da catástrofe que deixou 223 persoas falecidas
A veciñanza de Valencia homenaxea as vítimas dunha traxedia que afectou 78 concellos
Milleiros de persoas, 80.000 segundo datos da Delegación do Goberno, percorreron as rúas de Valencia para pedir de novo a dimisión do presidente autonómico, Carlos Mazón, pola xestión da DINA do pasado 29 de outubro.
Sete tractores encabezaron esta manifestación, a terceira dende as graves inundacións que deixaron polo menos 223 persoas falecidas, miles de afectadas e perdas millonarias na provincia.
Xusto cando fai dous meses da catástrofe, preto de sesenta organizacións cívicas, sociais e de esquerda convocaron a marcha, á que se adheriron máis de 150 entidades para buscar "verdade, xustiza e reparación".
Os colectivos organizadores aseguran que responde á "inactividade, falta de responsabilidade e xestión nefasta" do Goberno valenciano e lembran que, 61 días despois, aínda hai tres persoas desaparecidas.
As dúas mobilizacións anteriores foron o 9 e o 30 de novembro. A primeira reuniu 130.000 persoas e a segunda 100.000, segundo os datos que achegou a Delegación do Goberno.
Os tractores que encabezaron a marcha. EFE/Ana Escobar
