O Aquarium Finisterrae da Coruña pon ao descuberto os seus segredos

As visitas habituais ao Aquarium Finisterrae percorren só un 50 % das instalacións do museo. A actividade "Viaxe ao centro do Aquarium" leva o público á cara oculta, ás zonas técnicas que fan posible o seu funcionamento.

A idea xurdiu a partir do interese mostrado polos propios visitantes.

"No teu día a día ves o acuario exterior pero non ves o que pasa por dentro e tiñamos moito interese", di unha moza.

"É moi importante ver o que hai detrás de toda a xente que está traballando e o que custa ter este acuario en funcionamento para que todos poidamos gozar del", sinala outro visitante.

Unha das salas que chama a atención é a de cultivos, polas cores do fitoplancto en crecemento.

"Son algas minúsculas que temos no mar que nos serven para dar de comer, para manter, outros animais do acuario", explica o director técnico do centro.

Pero da visita sorprenden sobre todo os números. Na cociña prepáranse ao ano 20 toneladas de comida. 

"Manexamos diariamente entre 40 e 150 quilos de comida na cociña, que hai que preparar para cada un, coas súas dietas, cortada ao tamaño preciso", relata Francisco Armesto.

E se falamos da auga, entran 300 metros cúbicos á hora. A sala de bombeo e filtración está sempre en marcha.

 "O noso acuario recolle a auga mariña na baía do Orzán, a 200 metros do acuario e a 20 metros de profundidade. Desta forma garantimos a mellor calidade de auga", afirma o director técnico do acuario.

As visitas están abertas a maiores de dezaseis anos, realízanse en grupos de non máis de doce persoas unha vez ao mes e custan dez euros.