O acusado de atropelar un veciño en Outes di que "só quería asustalo"

O acusado de atropelar intencionadamente o seu veciño na praia de Broña negou este martes na Audiencia Provincial da Coruña que tivese intención de facerlle dano, pero si de darlle un susto.

"Eu nunca quixen facerlle dano ao accidentado, só quixen darlle un susto, nunca facerlle dano", afirmou.

O procesado dixo que a vítima, propietario dun bar na praia, o insultaba, o ameazaba e o vexaba, mesmo o acusou de agredilo sexualmente. O atropelado, pola súa banda, declarou que hai anos que non se falaban e que non era a primeira vez que recibía ameazas de morte por parte do seu veciño.

"Si, recibín ameazas del dicindo que me ía matar a min, a miña muller e os meus fillos".

Segundo se relatou no xuízo, o acusado circulaba en sentido contrario e invadiu a zona de contedores, onde a vítima estaba tirando o lixo. Fuxiu nun primeiro momento, pero despois regresou, dicíndolles aos axentes que o detiveron que lamentaba non acabar coa vida do seu veciño.

A Fiscalía pide para o acusado nove anos de prisión por intento de homicidio, mentres que a defensa reclama a absolución alegando que, por problemas psiquiátricos, non era consciente dos feitos.