O acusado de matar a súa exparella en Ribeira sae de prisión para unha reconstrución dos feitos

O home acusado do asasinato da súa exparella en Palmeira, no concello coruñés de Ribeira, saíu este xoves de prisión para participar nunha reconstrución dos feitos, ocorridos o pasado 19 de marzo.

O detido chegou á vivenda, entre fortes medidas de seguridade, ao redor das 11:45 horas deste xoves e permaneceu alí arredor dunha hora e media. Unha vez que a comitiva xudicial saíu da zona, efectivos da Policía Xudicial permaneceron na vivenda recollendo os últimos elementos.

Nela participaron efectivos da Policía Nacional, da Policía Local e da Policía Xudicial da Garda Civil, que cortaron o acceso á rúa Doutor Torres, onde se produciron os feitos. Tamén utilizaron un dron.

A reconstrución coincidiu cunha concentración convocada por Mulleres en Acción do Barbanza. Familiares da vítima, amigos e veciños mostraron o seu apoio diante da igrexa de Palmeira, a poucos metros de onde se cometeu o crime.

Durante estes meses, a asociación estivo en contacto coa familia da vítima, que lle pediu apoio ao coñecer que se ían realizar estas dilixencias. Marisol Guevara, unha das voceiras da entidade, explicou aos medios que esta reconstrución é "un momento moi duro" para a familia da vítima, que "está a revivir todo o acontecido".

Os feitos ocorreron na tarde do 19 de marzo, no domicilio onde residía a muller, Andrea Yturri, de 25 anos, que levaba tempo separada do presunto agresor.

O home, que xa tiña antecedentes por violencia machista, supostamente apuñalou a vítima na vivenda e posteriormente causou feridas a si mesmo, polo que tivo que permanecer hospitalizado. Ambos tiñan en común un fillo pequeno, que naquel momento non estaba na casa.