O acusado do crime de Jéssica Méndez di que non sabía quen ía no coche

O acusado de causar en marzo de 2022 a morte da moza Jéssica Méndez na localidade pontevedresa de Barro negouse este luns a declarar na primeira sesión do xuízo por este crime, en que só tomou a palabra para dicir que é inocente de asasinato e asegurar que non sabía quen ía no coche con que impactou e que non puido facer nada por evitar o choque.

Foi ao final dunha longuísima sesión inicial deste xuízo, na sección cuarta da Audiencia Provincial de Pontevedra, e despois de que o seu avogado reclamase que, aplicando xurisprudencia recente, se permitise ao seu defendido declarar en último lugar. O maxistrado que preside a sala rexeitouno, apuntando que os testemuños se farían como estaban sinalados.

Tras un receso, o maxistrado preguntáballe ao procesado como se declaraba dos cargos de asasinato. Ante o xurado popular, dixo ser inocente destes cargos e engadiu que non sabía quen ía dentro do coche cando chocou contra el e que non puido facer nada para "evitar" o choque que causou a morte de Jéssica Méndez. 

Fiscalía e acusacións particulares

Tanto a Fiscalía como as dúas acusacións —unha exércea a familia da falecida e outra o que era o seu mozo— repetiron en sala as posturas dos seus escritos, segundo os cales o que sucedeu aquela mañá en Barro foi un asasinato. Estas tres partes consideran que o procesado "acosaba" e "vixiaba" constantemente a Jessica Méndez desde que en 2012 esta rexeitara unha proposición amorosa. 

A fiscalía e a familia consideran que cando el circulaba pola estrada viu o coche da vítima parado nun sinal de STOP e abalanzouse contra ela por sorpresa, a representación da que era a súa parella cre que foi máis planificado e que el a estaba seguindo desde as 8 da mañá daquel día. O letrado tamén lembrou que o acusado dixo nalgunha ocasión sobre Jéssica: "Ou é para min, ou non é para ninguén".

A defensa do procesado, pola contra, asegura que o ocorrido é un "accidente fortuíto" derivado, entre outras cuestións, do tratamento con Tramadol que tomaba para unha lesión no dedo. Para o letrado da defensa, quen realmente estaba obsesionado con Jéssica era o cuñado do procesado, co que el mantiña unha mala relación desde había 15 anos, aínda a pesar de conviviren na mesma casa.