O estado de Robert Fico segue sendo grave, pero mantense estable

O primeiro ministro eslovaco segue grave, pero o seu estado estabilizouse tras o atentado que sufriu o pasado mércores, e mesmo logrou conversar brevemente co presidente electo do país. Segundo Peter Pellegrini, "foi un encontro moi humano e emotivo" e nel non trataron asuntos políticos "senón persoais".

Aínda que non foi confirmado polo equipo médico, especúlase sobre unha posible nova operación de cadeira do primeiro ministro. Ademais das feridas dos disparos sufridas, debe medicarse das súas insuficiencias cardíacas.

O suposto agresor é un "lobo solitario"

As investigacións sobre o intento de magnicidio están aínda na fase inicial, pero xa se sabe que o agresor actuou en solitario. O exgarda de seguridade, Juraj Cintula, de 71 anos, tiña licenza de armas. Di que actuou para frear as políticas do Goberno.

Nos últimos meses, o executivo de Fico, un líder populista que simpatiza con Rusia, tivo que enfrontar varias protestas cidadás pola eliminación da Fiscalía Anticorrupción ou polo seu plan para pechar a televisión pública.

Unha das súas rivais, a presidenta saínte Zuzana Caputova apelaba hoxe á responsabilidade de todos os partidos porque "o acontecido é un acto individual", dixo, "pero o ambiente de odio é a nosa obra común".

Pedro Sánchez reiterou o seu pesar polo acontecido. "Ningunha forma de violencia ten cabida nin xustificación posible na nosa sociedade", dixo o presidente do Goberno.

O Goberno eslovaco ordenou reforzar as medidas de seguridade arredor de políticos e xornalistas. O presunto agresor enfróntase a unha pena de entre 25 anos de cárcere e a cadea perpetua.