O barrio ourensán de Covadonga leva nunha semana tres incendios a carón das casas

As lapas achegáronse moi preto das vivendas de Covadonga por terceira vez nunha semana. Os veciños deste barrio de Ourense sumáronse aos labores de extinción para evitar que prendese o lume nas súas casas. 

"Estabamos arriba e oímos un ruído. Miramos pola ventá e estaba ardendo. Baixamos a apagar o lume. Non chegaban as mangueiras e tivemos que recorrer á piscina. Veu un veciño a axudarnos e máis ou menos puidemos controlalo ata que chegaron os bombeiros", di Cristina, unha veciña afectada.

Os máis afectados, os residentes das casas situadas a carón dos incendios, están preocupados por este problema que se repite cada vez con máis frecuencia.

"Nós vivimos aquí desde hai anos e cada dous por tres hai incendios porque se poñen nas casas de atrás a fumar e facer cousas que non deben e nós sufrimos as consecuencias".

Os incendios non son o único problema que sofren neste barrio. As casas abandonadas utilízanse como lugares de consumo de droga e acumulan lixo fóra e dentro. 

"Hai nenos pequenos e aquí anda entrando e saíndo xente con xiringas, fumando e meténdose cousas... É desagradable tamén".

Ademais intentaron entrar nesta vivenda, onde xa optaron por poñer un cadeado na ventá. Os afectados queren que se tomen medidas para garantir a seguridade.

"Pedimos que o alcalde bote man disto e bote estas casas abaixo, que pare a situación. Nós non podemos estar cada dous por tres pendentes de arde a casa ou non arde. Esta é unha situación de abandono!".

Reclaman que se manteña limpa a zona, que se retiren o lixo e a maleza, para loitar contra este problema crónico.