O Camiño supera o récord de peregrinos nun mes de maio con máis de 70.000 compostelas

O Camiño de Santiago rexistrou este mes de maio un récord de peregrinos cun total de 70.087 compostelas entregadas ata este xoves, moi por encima das seladas no mesmo mes do ano pasado e o anterior, a pesar de que ata 2022 aínda se celebraba o Xacobeo que empezou en 2021.

Só na xornada de onte xoves, 30 de maio, chegaron a Santiago 2.592 peregrinos e o día de maior afluencia, o 24 de maio, a cifra foi de 2.972. Desde o día 6, a afluencia non fixo máis que subir ata alcanzar onte os 73.821 peregrinos contabilizados, aínda que non todos eles selaron a compostela, a credencial que acredita facer algunha das rutas do Camiño de Santiago.

O presidente da Xunta, Alfonso Rueda, destacou este venres a "magnífica saúde" da que goza o Ruta Xacobeo, ao chegar onte ás 140.000 compostelas no que vai de ano, despois de entregar este mesmo mes a credencial número 100.000 a unha peregrina estadounidense.

Este mes a afluencia de peregrinos foi "espectacular", asegurou, en declaracións antes de realizar un tramo do Camiño en Ponte Maceira (Negreira), dentro da campaña para as eleccións europeas.

Rueda instou a "seguir así", con "sentidiño e sustentabilidade" porque considera que o Camiño de Santiago pode seguir crecendo.

E fronte aos que falan de "turismofobia", afirmou que Galicia aínda "ten capacidade" para atraer a máis turistas, apostando pola desestacionalización para distribuír estas visitas ao longo de todo o ano, algo que cre que xa se está conseguindo.

No que vai de ano, entregáronse 140.661 compostelas, a metade delas correspondentes a este mes de maio, mentres que o mes anterior, abril, a cifra foi de 42.361, e en marzo, 22.929. O resto, corresponden a febreiro (3.055) e xaneiro (2.229), segundo os datos facilitados hoxe pola Oficina do Peregrino de Compostela.

Os máis de 70.000 peregrinos de maio superan aos 61.141 do mesmo mes do ano anterior, e os 48.264 de 2022.

Por lugar de procedencia, a maioría dos camiñantes chegados no que vai de ano son estranxeiros, algo máis de 90.000, fronte aos máis de 48.000 de España. Entre os chegados de fóra destacan os de Estados Unidos, algo máis de 11.000; seguidos dos Alemaña, con case 10.000; Portugal cuns 8.300, e Italia, 7.000.

O Camiño francés segue sendo o máis concorrido, cuns 66.500 camiñantes, e o portugués (28.971) e o portugués da costa (22.430) a bastante distancia.