En Amoeiro piden moderación no uso da auga tras detectar consumos "elevadísimos"

O concello de Amoeiro pídelles aos seus veciños un consumo moderado e racional da auga. Detectaron nos últimos días un incremento no consumo que duplica o habitual. Non hai restricións polo de agora, pero algunhas vivendas percibiron xa menos presión da normal na traída. 

Dende o concello de Amoeiro piden responsabilidade aos veciños. 

"Hoxe temos unha situación no tema da auga bastante complicada no concello, porque normalmente durante o ano temos un consumo medio entre 750.000- 800.000 litros, e hoxe estamos superando o 1.200.000 litros. Traer a auga dende onde a traemos, que vén de Rivela, a nove quilómetros en liña recta e a 150 metros de desnivel é moi complicado, moi difícil e moi custoso e evidentemente se temos esta situación complícase aínda máis." Explica Brian Diz, concelleiro de Educación e Deportes no concello de Amoeiro.

Por iso piden que a auga da traída non se utilice para encher piscinas ou para regar e que o seu uso se limite o ámbito doméstico. O de Amoeiro, con 2.450 veciños, é o segundo concello con máis piscinas na provincia de Ourense.

"A auga agora no verán é cando hai que tratar de mirar por ela por ben de todos. Canto máis se vixíe mellor, é ben para todos, porque se empezamos a tirar moito, moito, moito, despois chegamos a un momento que nin un nin outro, non temos nada."

Non foi preciso polo de agora aplicar restricións pero deu lugar ao baleirado de depósitos e nalgunhas vivendas a presión que chega na auga da traída é menor do habitual.

"Todos os veráns hai escaseza de auga, pero o motivo realmente... todos gastamos o que nos parece, e ás veces non somos tamén conscientes da tirada de auga que facemos, sen necesidade."

Lembran que está prohibido lavar o coche e regar o céspede con auga da traída e piden ademais o uso preferente dos pozos naquelas vivendas que dispoñan deles.