O concello de Madrid valora se derrubar o edificio sinistrado
O concello de Madrid valora se derrubar o edificio sinistrado
É unha das opcións que baralla o concello tras detectar serios danos estruturais no inmoble.
Os veciños dos edificios lindeiros que se viron afectados agardan poder volver ás súas casas
Os drons da Policia Municipal de Madrid proporcionan esta visión do estado en que quedou o edificio da rúa Xeneral Pardiñas tras a explosión de gas que provocou a morte de dous operarios de 21 e 27 anos. Aínda que boa parte da fachada se mantén en pé, o interior está case completamente devastado. No momento do sinistro, as vítimas traballaban no terceiro andar.
As imaxes son de utilidade para a avaliación de danos e posibles riscos.
A vicealcaldesa da cidade, Begoña Villacís, di que "os técnicos de control de edificación viron as imaxes", que o estado por dentro é "desastroso" e que "probablemente se declare a quebra".
E é que mesmo despois de apuntalar a estrutura do inmoble, os técnicos ven risco de que algunhas zonas poidan virse abaixo e, segundo Villacís, consideran a demolición.
É unha das opcións pero aínda non o podemos confirmar. O que fagamos será para garantir a seguridade dos outros edificios.
Os veciños deste edificio non puideron nin entrar a recoller as cousas como si fixeron os dos dous edificios lindeiros, tamén desaloxados .
Nas próximas horas poderían volver á casa os propietarios dos pisos menos danados, segundo a vicealcaldesa
Inicialmente dixemos o luns e mantemos o luns, pero estamos traballando para ver se pode ser antes. Evidentemente, en canto poidamos asegurar con garantías que non van correr riscos, van poder volver pero imos ser moi cautos.
A última hora da mañá os técnicos municipais informaban de que algúns veciños si poden volver á súa casa hoxe mesmo.
