Puente explicará o 16 de outubro o plan para a AP-9 e o Parlamento galego esixe un estudo de custos do traspaso
Puente explicará o 16 de outubro o plan para a AP-9 e o Parlamento galego esixe un estudo de custos do traspaso
Puente explicará o 16 de outubro o plan para a AP-9 e o Parlamento galego esixe un estudo de custos do traspaso
A petición de comparecencia do ministro no Congreso dos Deputados foi impulsada polo Partido Popular
O PPdeG lembrou que a Xunta xa conta cun informe que cifra en 526 millóns de euros o custo da transferencia da autoestrada AP-9 a Galicia
O ministro de Transportes Óscar Puente deberá comparecer o 16 de outubro no Pleno do Congreso para explicar os seus plans sobre o traspaso da autoestrada do Atlántico á Xunta de Galicia, unha transferencia coa tramitación parlamentaria bloqueada na Cámara dende hai meses.
A petición de comparecencia foi impulsada polo PP e, segundo fontes parlamentarias, este martes foi aprobada na Xunta de Voceiros do Congreso.
Óscar Puente deberá dar conta da "posición do Goberno en relación coa activación do traspaso da titularidade e xestión a Galicia da AP-9, e tamén do cumprimento dos compromisos que adquiriu en materia de implantación de novas bonificacións aos usuarios da autoestrada, expresadas polo candidato socialista José Ramón Gómez Besteiro na campaña das últimas eleccións autonómicas".
No PP galego celebraron que se deu vía libre á comparecencia, máxime ao ser no Pleno do Congreso e non só en comisión.
Proposta do Parlamento Galego
O Parlamento Galego aprobará este mércores unha proposición non de lei para esixir ao Goberno central a elaboración dun "estudo serio e minucioso” sobre o custo que suporía o rescate e a gratuidade da autovía do Atlántico, AP-9.
A proposta, impulsada polo PPdeG, maioritario na Cámara, insiste na necesidade dun estudo destas características despois de que membros do Goberno central, como o ministro de Transportes Óscar Puente, ofrecesen diferentes cifras sobre este custo.
O deputado do PPdeG Roberto Rodríguez lembrou que a Xunta xa conta cun informe que cifra en 526 millóns de euros o custo da transferencia da autoestrada AP-9 a Galicia, mentres que sitúa o prezo do rescate entre os 1.612 e os 2.355 millóns.
O parlamentario lamentou que o Executivo de Sánchez negue este diñeiro a Galicia mentres facilita un montante similar ao rescate doutra infraestrutura en Alacante.
Con todo, en Galicia “Sánchez volve dicirnos non, e todos vostedes tragan”, reprochou Rodríguez aos parlamentarios socialistas e nacionalistas do Parlamento Galego.
Pola súa banda, no BNG, o deputado Paulo Ríos reprochou ao PP que volva traer este asunto á Cámara co único obxectivo de “meter o dedo no ollo a Sánchez”.
Respecto do informe encargado pola Xunta, o nacionalista criticou que a Consellería de Infraestruturas non remitise a documentación ao Parlamento e se limitase a presentalo en conferencia de prensa sen que se puidese contrastar.
A falta de transparencia, en opinión de Ríos, evidencia que o Goberno gastou os 18.000 euros que custou este informe, unicamente co obxectivo de ter “unha nova arma” que lanzarlle ao Goberno de Sánchez.
Fronte a iso, o deputado de Bloque pediu á Xunta seriedade e responsabilidade: "Deixen de utilizar o pobo galego como refén das súas prácticas partidistas”.
“Espero que o PP faga gala da súa coherencia e nos pase os informes”, reclamou Ríos, que, en todo caso, avanzou que os nacionalistas apoiarán a petición dos populares.
Con todo, o parlamentario do PSOE galego Carlos López Font cargou contra a “hipocrisía maiúscula” do PP “á hora de culpabilizar” o resto das decisións “que teñen a marca e o selo do PP” e que foron asinadas polos seus dirixentes, como é o caso da prórroga da concesión da AP-9.
