O Coruxo cede un empate (2-2) nun disputado partido co Marino

O Coruxo tivo a vitoria contra o Marino de Luanco na palma da man, pero tivo que conformarse co empate a dous logo dun disputado encontro que puido caer para calquera bando. Os asturianos adiantáronse axiña, logo dunha acción que culminou Jairo cando so ían disputados dez minutos de partido.

Co Marino defendendo a súa renda, o Coruxo foi quen de empatar so uns minutos despois. Chiqui anotaba o un a un cun remate lonxano que bateu nun defensor. 

No inicio da segunda metade o Marino botouse arriba buscando o segundo, e foi entón cando o Coruxo conseguía o tanto da remontada. Luismi marcaba no man a man logo dunha gran asistencia.

Pero o Marino de Luanco non dixera a última palabra. Logo dun par de boas ocasións, incluído un remate ao traveseiro, Luis Nuño marcaba o dous a dous que xa sería definitivo a catro minutos do noventa. O empate mantén ao Coruxo na parte alta da clasificación.