O cribado de cancro colorrectal do Sergas detectou en dez anos máis de 2.600 tumores
O cribado de cancro colorrectal do Sergas detectou en dez anos máis de 2.600 tumores
Máis do 65% deles estaban en fases iniciais
Este é o cancro máis frecuente en Galicia e o segundo con máis mortalidade, con 1.100 falecementos ao ano
O programa de cribado de colon que puxo en marcha o Sergas hai xa dez anos permitiu detectar un total de 2.600 tumores. Máis do 65% deles estaban en fases iniciais.
O presidente da Xunta de Galicia, Alfonso Rueda, subliñou estes datos e a relevancia que ten este cribado para salvar vidas, xa que este é o cancro máis frecuente en Galicia e o segundo con máis mortalidade. Causa 1.100 falecementos ao ano.
Estes datos forman parte do informe presentado este luns durante o Consello da Xunta.
O programa, destacou o Goberno galego, iniciouse na área de Ferrol no ano 2013 e na actualidade está implantado en toda Galicia. En xullo do ano 2019 completouse unha rolda de cribado en todas as áreas sanitarias.
Desde o inicio deste programa, que desenvolve a Dirección Xeral de Saúde Pública, enviáronse 2.331.114 invitacións a participar, o que supón preto dun 99% de homes e mulleres de 50 a 69 anos.
Así mesmo, o informe constata que nos últimos anos existe unha tendencia ascendente na participación, de maneira que no 2023 superou o 54% derivada, en parte, polo cambio de estratexia do programa, que pasou no 2022 a enviar directamente os tests aos domicilios.
Por xéneros, as mulleres lideran a participación, cunha taxa do 56%, fronte ao 44% dos homes. Existen diferenzas na taxa de positividade global, máis alta nos homes, 7,14%, fronte ao 4,54% en mulleres.
Desde o inicio do programa e ata decembro de 2023, realizáronselles colonoscopias a 56.641 persoas e detectáronse 23.100 persoas con lesións que requiren vixilancia con colonoscopia, o que supón unha taxa de detección de lesións a seguimento do 21,6% por cada 1.000 persoas.
Para a Xunta, todos estes datos reflicten que o programa galego está a cumprir cos obxectivos marcados, tanto a nivel nacional como europeo. Como valor engadido, o programa incorpora as actividades de seguimento mediante colonoscopia de todas as persoas ás que se lles detecta un risco alto ou intermedio de padecer un cancro colorrectal.
