O director de Protección Civil será o novo máximo responsable da Garda Civil

O Consello de Ministros nomeará o vindeiro martes novo director xeral da Garda Civil a Leonardo Marcos, actual director xeral de Protección Civil e Emerxencias, segundo informou este venres o Ministerio do Interior.

Marcos substituirá a ata o de agora directora xeral do corpo, Mercedes González, que ten que dimitir do cargo pola súa inclusión nas listas polo PSOE ao próximo 23X tras un mandato de só dous meses, o máis curto da democracia.

Tras esta decisión, a proposta dos titulares de Defensa e Interior, a Garda Civil foi dirixida no que vai de ano por tres persoas: María Gámez, a primeira directora xeral da Garda Civil na historia e quen anunciou que deixaba o cargo o pasado 22 de marzo polas investigacións xudiciais ao seu marido; Mercedes González e Leonardo Marcos.

Marcos, natural de Valderas (León), é licenciado en Dereito pola Universidade Autónoma de Madrid, cursou o programa de Alta Dirección no Instituto Nacional de Administración Pública e pertence ao Corpo Superior de Administradores Civís do Estado.

Ata o seu nomeamento como director xeneral de Protección Civil en xaneiro de 2020, Marcos fora secretario xeral da Delegación do Goberno en Castela e León, inspector no Ministerio do Interior, subdirector xeral de Recursos Humanos no Instituto Nacional de Estatística (INE) e subdirector xeral de Posgraduado e Doutoramento no Ministerio de Educación.

Tamén foi conselleiro de Información nas embaixadas de España na Arxentina, nos Estados Unidos e na China.