O emprego do galego, o éuscaro e o catalán xa é oficial no Congreso

O uso do catalán, éuscaro e galego xa é oficial no Congreso tras a aprobación definitiva da reforma do regulamento da cámara que implantará as linguas cooficiais en toda a actividade parlamentaria e tras rexeitar as emendas á totalidade do PP e de Vox.

A reforma do regulamento que permitirá usar o catalán, o éuscaro e o galego no Congreso foi ratificada en presenza do presidente do Goberno en funcións, Pedro Sánchez, por 180 votos a favor, entre eles o da deputada do PP por Ourense, Rosa Quintana, que segundo fontes do PP votou si por equivocación.

PSOE, Sumar, ERC, Junts, Bildu, PNV, BNG e CC avalaron o uso do plurilingüismo no Congreso, que con todo recibiu os 170 votos en contra do PP, Vox e UPN.

Ademais esta reforma incluíu unha emenda do PNV que pedía dar validez xurídica ás traducións para que as leis que se aproben na cámara baixa e sexan publicadas polo Congreso teñan carácter de versión auténtica en todas as linguas oficiais do Estado.

O pleno do Congreso rexeitou ademais as emendas á totalidade do PP e Vox e mentres a emenda de Vox recibiu 179 votos en contra e 138 abstencións procedentes do PP e de UPN, a iniciativa dos populares foi votada a favor polos de Abascal e sumou 170 si fronte aos 179 non.

Fronte á abstención do PP á emenda de Vox, o seu líder, Santiago Abascal, sinalou na rede social X (antes Twitter) que "o PP aínda segue sen darse conta do desafío" ante "Sánchez e os seus cómplices preparando o golpe, humillando o Congreso e os tribunais, liberando violadores, negociando con prófugos, rendendo as fronteiras".

"Señor Feijóo, hai que enfrontar a realidade. A súa investidura non ten outro sentido que o de visibilizar o ataque á nación e á convivencia. Non hai equidistancia posible entre os golpistas e a unidade de España", recalcoulle.

Debate marcado pola amnistía e as queixas dos grupos independentistas

O debate sobre o uso das linguas deste xoves estivo marcado polas críticas da dereita ao PSOE por apoiar esta reforma do regulamento a cambio das esixencias dos independentistas cataláns e tras as declaracións do presidente do Goberno en funcións, Pedro Sánchez, de evitar a xudicialización do conflito en Cataluña.

Así, o PP, Vox e PSOE centraron as súas intervencións na lei de amnistía que Junts puxo sobre a mesa e en reproches mutuos, mentres que os independentistas cataláns e vascos quixeron resaltar a importancia deste día, que cualificaron de "histórico" ao aprobarse o plurilingüismo na cámara.