O futuro de Daniel Sancho: dous recursos e unha difícil entrega a España

Daniel Sancho esquivou este xoves pola súa colaboración coa Xustiza a pena de morte, a condena máis grave á que se enfrontaba polo asasinato do colombiano Edwin Arrieta en Tailandia, e agora enfróntase a un longo proceso de recursos e peticións co obxectivo último dun traslado a España.

Sancho atópase en prisión provisional no cárcere tailandés de Samui, onde ingresou o 7 de agosto de 2023, cinco días despois do crime na veciña illa de Phangan.

Vai ser trasladado a unha prisión máis dura?

En principio, si. Aínda que Sancho pediu ao xuíz permanecer na prisión de Samui, a lexislación tailandesa non o permite, por tratarse dunha condena a máis de 15 anos de prisión.

Hai dúbidas sobre onde o van mandar, pero prevese que poida ser a prisión de Surat Thani ou a de Nakhon Se Thammarat, as dúas superpoboadas.

Con todo, na prisión de Samui están "a esperar a orde de traslado" e non saben a que centro penal podería ser enviado nin cando, aínda que se prevé que poida ser inminente.

Segundo o informe nacional de correccionais de Tailandia, Surat Thani ten preto de 5.400 reos e o cárcere de Nakhon Se Thammarat, máis de 4.200, fronte aos 542 do penal de Samui.

Pódese recorrer a condena?

Si. De feito os seus avogados xa anunciaron que o farán.

Sancho ten dúas opcións, como explicou o propio xuíz. Primeiro pode recorrer ante o Tribunal de Apelacións e en último lugar ante o Tribunal Supremo, un proceso que pode demorar arredor dun ano, segundo fontes xurídicas.

Por contra, aínda que tamén ten dereito a facelo, a familia de Arrieta anunciou que non vai recorrer a indemnización fixada polo xuíz en ao redor de 106.000 euros.

Ten opción dun indulto real para rebaixarlle a pena?

Si. As autoridades tailandesas adoitan emitir indultos colectivos de maneira regular e que coinciden con determinadas datas relixiosas ou vinculadas á monarquía do país, tales como o aniversario do rei Vajiralongkorn (o 28 de xullo). A través destas medidas de graza, que só poden solicitarse unha vez a sentenza sexa firme, Sancho poderá ir rebaixando de maneira parcial a súa condena.

Ten dereito a recibir algunha axuda de España?

Si. A rede de Oficinas Consulares de España trata de paliar na medida do posible as condicións non sempre adecuadas nas que cidadáns españois cumpren condena no estranxeiro. A atención pódese materializar en asistencia non económica ou económica.

En caso de necesidade, a embaixada ou consulado pode entregar unha axuda que, como máximo, pode alcanzar os 120 euros mensuais sempre que a súa familia ou achegados non poidan proporcionarlla.

Pode ser trasladado a España?

Entre Tailandia e España non hai un acordo de extradición pero existe un convenio para transferencia de presos que entrou en vigor en 1987, apto unha vez a condena sexa firme e para quen non teña pendente outro proceso xudicial.

O punto 4 do artigo III deste convenio especifica que deste acordo poden beneficiarse, entre outros, os condenados a prisión perpetua.

O artigo II subliña que non están suxeitos a traslados aqueles que cometesen un delito "contra a seguridade interior ou exterior do Estado; contra o xefe de Estado ou membros da súa familia; en materia de contrabando de antigüidades ou tesouros do patrimonio artístico nacional".

Sancho deberá cumprir polo menos catro anos de prisión en Tailandia antes de poder solicitar o seu envío a España, que debe estar de acordo coa entrega así como o país asiático.

Outro requisito indispensable para que se produza o traslado é que Sancho complete o pago da indemnización establecida polo tribunal para a familia da vítima.

Existe algún precedente similar entre España e Tailandia?

Si. O español Artur Segarra foi condenado en 2017 por un tribunal de Bangkok á pena de morte polo asasinato premeditado do seu compatriota David Bernat, e foi trasladado días despois da sentenza desde a prisión Bangkok Remand ao penal da capital de máxima seguridade Bang Kwang, onde continúa e onde se atopan a maioría de condenados á pena capital.

A condena de Segarra quedou reducida a cadea perpetua en 2020 por clemencia do monarca Vajiralongkorn.