O Goberno obrigará a que móbiles e dispositivos incorporen un control parental gratuíto
O Goberno obrigará a que móbiles e dispositivos incorporen un control parental gratuíto
A idade media de acceso ao primeiro móbil está nos 11 anos
O Executivo contempla un plan de alfabetización dixital para que os menores obteñan autonomía neste ámbito
![Imaxe de arquivo](https://img-g24-crtvg.flumotion.com/prog24/2023/20230829/20230829menorinternet.jpg)
O Goberno obrigará a que móbiles e dispositivos electrónicos teñan incorporado un control parental gratuíto, sinxelo e accesible, segundo expón o anteproxecto de lei para a protección dos menores en contornas dixitais que ten previsto aprobar este martes o Consello de Ministros.
A lei, impulsada polo Ministerio de Xuventude e Infancia e na que interveñen tamén outros departamentos, como Presidencia e Xustiza e Transición Dixital, irá acompañada dunha estratexia nacional para a protección da infancia e a mocidade nas contornas dixitais, que o Goberno quere aprobar no outono, unha vez que o comité de expertos creado con ese obxectivo entregue o seu informe o 20 de xuño.
No ámbito educativo, o Executivo contempla un plan de alfabetización dixital para que de maneira transversal se impartan desde idades temperás (en primaria e secundaria) coñecementos para a autonomía dos menores no ámbito dixital e ferramentas para combater, por exemplo, as loiadas. Isto farase a través de distintas materias, como a educación afectivo-sexual.
Todos os móbiles, tabletas, computadores e televisores terán que incluír de fábrica a función de control dixital parental para que poida ser activada polos pais ou titores, que poderán decidir que aplicacións, servizos e contidos limitan aos menores. Esta función deberá aparecer de maneira clara, como a selección de idioma.
Outra das medidas, segundo explicaron fontes do Goberno, é a regulación da etiquetaxe e das advertencias de todos os produtos dixitais sobre os contidos aptos ou non para menores das aplicacións, cunha linguaxe entendible e accesibles tamén para persoas con discapacidade, como nenos con autismo.
O anteproxecto incorpora parte do diagnóstico e das recomendacións debatidas polo medio centenar de expertos que conforman o comité. As achegas deste órgano irán máis aló da regulación dunhas contornas dixitais cambiantes e que precisan dunha estratexia que aborde as medidas no tempo, segundo explican as fontes.
A regulación inclúe, por vez primeira, os dereitos dos menores na contorna dixital, a través do artigo 2.
O primeiro móbil, aos 11 anos
O anteproxecto que se envía ao Consello de Ministros vai acompañado dun diagnóstico sobre o impacto das contornas dixitais en menores de idade realizado polo Ministerio de Xuventude e Infancia, coas primeiras achegas dos expertos.
Segundo ese diagnóstico, a idade media de acceso ao primeiro móbil sitúase nos 11 anos.
Respecto a o seu uso, o 94,8% dos adolescentes dispón dun teléfono móbil con Internet e un 90,8% conéctase todos ou case todos os días; a metade dos adolescentes usa Internet máis de 5 horas ao día nas fins de semana e un 31,6% entre semana.
O 98,5% dos adolescentes está rexistrado nalgunha rede social e ata un 83,5% en tres ou máis. Os menores usan o móbil para comunicarse (84,1%), buscar información (83,6%) e lecer dixital (79,9%); a iso dedican case 7 horas ao día de conexión.