O IPC sobe seis décimas en novembro, ata o 2,4 %, pola alza da electricidade
O IPC sobe seis décimas en novembro, ata o 2,4 %, pola alza da electricidade
O INE incorpora no avance de datos do IPC unha estimación da inflación subxacente (sen alimentos non elaborados nin produtos enerxéticos), que en novembro diminuíu unha décima, ata o 2,4 %, e igualou así o índice xeral
.png)
A inflación subiu seis décimas en novembro, ata o 2,4 %, debido principalmente ao encarecemento da electricidade e dos carburantes, cuxos prezos baixaron no mesmo mes do ano pasado.
Segundo o dato adiantado do Índice de Prezos de Consumo publicado este xoves polo Instituto Nacional de Estatística, a taxa xeral leva dous meses consecutivos á alza e deixa atrás unha tendencia de catro meses de baixada que comezou en maio.
O departamento que dirixe Carlos Cuerpo subliñou que a media de inflación nos últimos 12 meses se situou no 2,8 %, "mantendo a senda descendente respecto ao pico alcanzado en 2022".
En concreto, reduciuse un punto respecto á media do pasado ano e é case tres veces inferior á de 2022.
"Esta redución pon de manifesto a eficacia das medidas de política económica postas en marcha, que están a permitir compatibilizar o maior crecemento entre as principais economías da zona euro e seguir reducindo a inflación de forma continuada", indicou Economía.
A subxacente cae o 2,4 %
O INE incorpora no avance de datos do IPC unha estimación da inflación subxacente (sen alimentos non elaborados nin produtos enerxéticos), que en novembro diminuíu unha décima, ata o 2,4 %, e igualou así o índice xeral.
En termos mensuais (novembro sobre outubro), o IPC incrementou un 0,2 % respecto ao mes anterior, catro décimas menos do que aumentou en outubro. Pola súa banda, o IPC harmonizado (IPCH) escalou seis décimas en novembro, ata o 2,4 %, e mantívose sen cambios en valores mensuais. O INE publicará os datos definitivos do IPC de novembro o próximo 13 de decembro.
.png)
