O mal tempo obrigou a suspender a procesión dos Caladiños na Coruña

Na Coruña, a chuvia impediu a saída da procesión dos Caladiños, que organiza a confraría de Nosa Señora da Soidade e do Santo Enterro. 

Os fieis tiveron que conformarse con ver o paso no interior da igrexa da Orde Terceira. Da talla policromada da Virxe, de orixe italiana, sábese que xa procesionaba no ano 1674. A imaxe está vestida cun mantón rexional típico da alta burguesía galega de finais do século dezaoito, doado por unha devota.

Este foi o penúltimo acto da Semana Santa coruñesa, que se despide este domingo, se o tempo o permite, co desfile de Xesús Resucitado e Nosa Señora da Esperanza.