O PP pedirá recusar dúas maxistradas do TC e que Pumpido se aparte do caso dos ERE
O PP pedirá recusar dúas maxistradas do TC e que Pumpido se aparte do caso dos ERE
O PP argumenta que os tres están relacionados co PSOE ou "participaron anteriormente" no proceso xudicial da trama
![(María José López / Europa Press)](https://img-g24-crtvg.flumotion.com/prog24/2024/20240711/EuropaPress_5674057_sala_audiencia_provincial_donde_juzga_juan_francisco_trujillo_exchofer.1720696161.41.jpg)
O PP vai pedir nos próximos días a recusación de dúas maxistradas do Tribunal Constitucional (TC), Inmaculada Montalbán e María Luisa Balaguer, e que o seu presidente Cándido Conde-Pumpido se aparte dos recursos que afecten o caso dos ERE.
O vicesecretario de Coordinación Autonómica e Local do PP Elías Bendodo anunciou esta decisión nunha conferencia de prensa este xoves no Congreso dos Deputados na que repasou a traxectoria profesional destes maxistrados e a súa vinculación co PSOE ou co proceso xudicial da trama pola que foron condenados dirixentes socialistas en Andalucía.
O PP lembrou que Cándido Conde-Pumpido se abstivo cando a causa dos ERE chegou ao Tribunal Supremo porque sendo fiscal xeral do Estado "participou na tramitación deste asunto"; sostén que tería que facer "exactamente o mesmo nesta ocasión como presidente do Constitucional".
De Inmaculada Montalbán, o PP denunciou que presidiu a sección terceira da sala do contencioso administrativo do Tribunal Superior de Xustiza de Andalucía e "foi relatora ou participou en polo menos 22 sentenzas relacionadas cos ERE"; a María Luisa Balaguer cuéstionana por ser conselleira do Consello Consultivo de Andalucía e relatora de 28 ditames sobre toda a casuística do caso dos ERE.
O dirixente do PP tamén puxo en cuestión outros dous maxistrados do TC, Juan Carlos Campo e María Luisa Segoviano, aos que aínda non pedirá recusar, aínda que o partido de Alberto Núñez Feijóo non descarta ampliar as súas accións a este respecto.
De Campo, quen fora ministro de Xustiza no Goberno de Pedro Sánchez, o PP denunciou que pasou do Ministerio ao Constitucional e que ademais foi director xeral de Xustiza co presidente andaluz Manuel Chaves "no período investigado polos ERE" e secretario xeral de Relacións co Parlamento entre 2014 e 2015, cando a Cámara abordou en moitas ocasións a trama.
De Segoviano apuntan ademais que como maxistrada da sala do social do Tribunal Supremo asinou dúas sentenzas relacionadas co caso dos ERE.
O PP argumenta que estes membros do Tribunal Constitucional participaron anteriormente en decisións deste caso e non deben participar na votación no Constitucional para garantir a "obrigada aparencia de imparcialidade" que ten que ter este órgano.
O principal partido da oposición argumentou que o dos ERE é o maior caso de corrupción da historia de España, que máis de 20 xulgados, incluídos a Audiencia Provincial de Sevilla e o Tribunal Supremo, "confirmaron e ratificaron as sentenzas aos condenados por prevaricación e malversación".
"No que o Constitucional non pode converterse é nun órgano de relectura ou de segunda lectura ou de revisión das sentenzas, non do supremo, senón de 20 tribunais que xa falaron no mesmo sentido", recalcou Bendodo, apuntando a que ata 70 familiares e persoas vinculadas co PSOE se beneficiaron de "axudas ilegais ou de falsas prexubilacións".