O PP, PSOE, Sumar e Junts pechan o acordo para sacar adiante a lei ELA

O PP, PSOE, Sumar e Junts acordaron un texto para sacar adiante a Lei de Pacientes con Esclerose Lateral Amiotrófica (ELA), que inclúe a atención continuada especializada 24 horas para as persoas con ELA en estadios avanzados.

Trátase dunha lei específica para a ELA e enfermidades ou procesos neurolóxicos de alta complexidade, que se pechou este luns pola noite tras meses de negociación entre os grupos.

Segundo indican fontes populares, o texto acordado tamén inclúe a posta en marcha dunha estrutura para a investigación sobre a ELA, a aposta pola axuda a electrodependentes e consumidores vulnerables ou a capacitación específica dos profesionais, mais a dotación económica necesaria.

Tras este acordo, espérase poder presentar o texto a semana que vén en comisión, segundo sinalan a EFE fontes parlamentarias. O obxectivo dos grupos é poder aprobala no pleno do Congreso en outubro e levala ao Senado, onde se aprobaría definitivamente grazas á ampla maioría de apoios que tería previsiblemente.