O presunto asasino de Mateo di que non se puido controlar e que o fixo o seu "outro eu"

O suposto asasino de Mateo, o neno de 11 anos apuñalado mortalmente en Mocejón (Toledo), confesou o crime na súa primeira declaración prestada tras ser detido na casa do seu pai, segundo informaron fontes próximas á investigación.

Nesa declaración ante os axentes dixo que non se puido controlar e que o fixo o seu "outro eu". Así o recollen fontes citadas pola Axencia EFE e que indicaron que o detido deliraba ao falar e non mantiña un discurso coherente, o que podería indicar que sufra algún trastorno.

As fontes precisaron que o mozo padece un trastorno mental e, segundo publicou o xornal ABC, seu pai afirma que ten un 70 por cento de discapacidade.

Polo momento, o detido atópase en dependencias da Comandancia da Garda Civil de Toledo. 

Os rexistros policiais tiveron lugar este luns tanto na casa do pai como da avoa, onde os axentes da Garda Civil acudiron co detido arredor das 14 horas para levar a cabo a inspección do domicilio.

Na casa da avoa o presunto agresor cambiou a roupa, aínda que se descoñece se antes ou despois de cometer o crime.

O sospeitoso é un mozo de 20 anos, cidadán español, que aínda que non é veciño da localidade residía temporalmente alí, xa que é onde vive seu pai e a súa avoa. Precisamente no domicilio de seu pai foi onde se produciu a detención.

Segue a busca da arma do crime

Diversas dotacións da Garda Civil centráronse na tarde deste luns en rastrexar a canle de rega de Mocejón, que o domingo discorría con caudal e foi baleirada pola mañá. Dous axentes inspeccionaron a canle coas súas mans, aínda que na busca tamén se utilizou unha máquina que extrae o barro do fondo (o leito era dun palmo de auga embarrada) e ten un imán para detectar obxectos metálicos.

Alí continúan esta mañá os traballos na busca da arma coa que se cometeu o crime, da que polo momento só transcendeu que era un obxecto punzante.

A delegada do Goberno en Castela-A Mancha, Milagros Tolón, explicou esta mañá que nestes momentos unidades especiais da Garda Civil chegadas desde Madrid tratan localizar esa arma é o principal obxectivo da investigación, que permanece baixo segredo de sumario, polo que non desvelou se a zona de busca segue a ser a mesma do día anterior.

A delegada do Goberno, na comparecencia que realizou esta mañá, destacou o traballo "espectacular" da Garda Civil, que en menos dun día identificou, localizou e arrestou o sospeitoso. 

Tivo ademais duras palabras para as persoas que durante as horas que sucederon a este crime incendiaron as redes sociais con mentiras. "Pódese ser máis cruel ou máis miserable", preguntouse Milagros Tolón, quen dixo que o detido "se se demostra que é culpable, terá que render contas ante a xustiza polo dano causado".

Ao preguntarlle por se o Goberno vai tomar algunha medida contra estes "sementadores de odio", tal e como Tolón os cualificou, respondeu que isto é unha cuestión da sociedade civil e "de todos", polo que reiterou o chamamento á "sensatez".

Engadiu ademais que a Garda Civil fará chegar aos medios de comunicación este mércores un vídeo con todo o dispositivo despregado en Mocejón desde a morte de Mateo o domingo pola mañá.