O PSOE acusa a Feijóo de "torpedear" para lograr o seu obxectivo: unha repetición electoral

O portavoz do PSOE no Congreso, Patxi López, afirmou que o PP non vai conseguir o apoio dos catro deputados que necesita para sacar adiante a investidura de Feijóo, que, ao seu xuízo, o único que pretende é "dilatar" e "torpedear todo" para chegar ao seu obxectivo, que é unha repetición electoral.

Para López, a decisión de líder popular de aceptar a proposta do rei e presentarse como candidato á Presidencia do Goberno "abócanos a unha investidura fake, a unha crónica dun fracaso anunciado, a un novo fracaso de Feijóo, que o único pacto que ten é con Vox, e agora con CC, ademais de UPN.

"Non o van conseguir de ningunha maneira, é unha estratexia supoño para ver se conseguen o obxectivo que teñen detrás que é a repetición das eleccións, pero os cidadáns non se equivocan", insistiu López en declaracións á Cadena Ser.

Por iso, o portavoz socialista dixo que a vontade do seu partido é de chegar a un acordo como xa o fixo para constituír a mesa do Congreso.

"Hai unha maioría que é posible para conseguir unha investidura e nós imos falar con todas esas formacións políticas para facer posible esa investidura e non fracasar como vai fracasar o señor Feijóo porque nós de ningunha das maneiras queremos que haxa unha repetición electoral porque iso non é o que queren os cidadáns e as cidadás deste país", subliñou.

Ao preguntarlle directamente se é partidario dunha amnistía en Cataluña como piden os independentistas para apoiar a candidatura do líder do PSOE, Pedro Sánchez, respondeu: "Se eu digo calquera cousa sobre a amnistía vai haber interpretacións".

López pediu deixar de lado as especulacións que "nunca veñen ben ao que son unhas conversacións normais que se teñen que dar para buscar os entendementos".