O desbordamento do Mandeo causa inundacións en varias zonas de Betanzos

O desbordamento do río Mandeo en Betanzos, coincidindo coa preamar de máis de catro metros e o gran caudal existente, provocou enchentes nalgunhas zonas do municipio, en concreto na Tolerancia, Porto e Ribeira.

Así o informou o consistorio, que explica que se mantén un dispositivo de vixilancia "ante o risco de que nas próximas horas volvan producirse inundacións" nestas tres zonas "como as ocorridas á primeira hora". O sucedido atribúeo á "preamar, un episodio de choivas e a subida do caudal do río Mandeo, cunha velocidade e presión da auga moi elevada". Todas esas circunstancias provocaron que o río se desbordase na zona da Ribeira, Porto e Tolerancia e que tivesen que actuar os servizos de emerxencia de Protección Civil.

Para este martes, a previsión é que a preamar da mañá chegue a niveis tamén moi elevados, sobre os 4,08 metros. Estes niveis baixarán a partir do mércores, segundo as previsións.

"Do mesmo xeito que hai unhas semanas, cando se desbordou o río, o caudal do Mandeo e a velocidade da auga fan pensar que todo é provocado pola apertura de portas de presas augas arriba, que neste caso non foi comunicada ao Concello", sinala o consistorio.

Respecto diso, avanza que pedirá información sobre este feito, apuntado polos técnicos, co fin de que "na medida do posible, esta apertura non coincida con episodios de preamar tan alta".