O sector turístico modera o crecemento respecto a 2023 malia subir as vendas un 7,8 %
O sector turístico modera o crecemento respecto a 2023 malia subir as vendas un 7,8 %
Exceltur calcula que o PIB turístico en España medrará un 4,6 %, ata os 202.650 millóns de euros
A demanda estranxeira segue tirando con forza tanto en chegadas como en gasto en destino, que creceu en maio preto do 20 %
![](https://img-g24-crtvg.flumotion.com/prog24/2022/20220901/turismo.png)
O sector turístico modera o seu crecemento respecto ás taxas de dous díxitos vistas o ano pasado, pero segue subindo a un ritmo do 7,8 % en vendas, un proceso de "normalización" que continuará no verán, impulsado sobre todo pola demanda internacional, xa que a doméstica evoluciona de forma máis discreta.
Segundo un informe presentado este xoves pola alianza turística Exceltur, na que están grandes do sector da hostalería, aeroliñas, aseguradoras e xestores de viaxes, entre outros, no verán o crecemento das vendas moderarase ata o 5,3 %, tras o "atípico" positivo desempeño do primeiro trimestre (12,4 %) e o segundo (7,8 %).
Calculan que o PIB turístico en España crecerá un 4,6 % en termos reais (8,6 % nominal), ata os 202.650 millóns, de forma que o conxunto do sector subirá ata o 13,2 % do PIB nacional.
Unha parte do crecemento de vendas explícase polo reposicionamento da oferta cara a produtos de maior valor engadido, que ademais contribúen a impulsar a creación de emprego. Más dun 50 % dos empresarios consultados por Exceltur calculan que aumentarán os postos de traballo.
A demanda estranxeira segue tirando con forza tanto en chegadas como en gasto en destino, que creceu en maio preto do 20 %, por riba do que o fai o nacional que, con todo, anticipou o inicio da tempada.
A alianza identifica unha diferenza entre os viaxeiros procedentes do exterior que se aloxan en hoteis, cuxo gasto crece case un 8 %, ata os 262 euros diarios, e os que alugan vivendas turísticas, entre os que a media diaria se sitúa en 152 euros, e son para Exceltur os responsables do maior aumento da presión sobre os destinos.