Un comité do Sergas decidirá que tratamentos son máis efectivos en casos dubidosos de cancro
Un comité do Sergas decidirá que tratamentos son máis efectivos en casos dubidosos de cancro
O comité molecular de tumores forma parte da Estratexia de Oncoloxía de Precisión de Galicia
O Sergas porá en marcha esta semana un comité molecular de tumores, onde expertos de todas as áreas sanitarias decidirán que tratamento é máis efectivo en casos dubidosos de cancro. Así o anunciou este mércores a Xunta na presentación da Estratexia de Oncoloxía de Precisión de Galicia, á que asistiu o xefe do Goberno autonómico, Alfonso Rueda.
Os oncólogos xa non falan de cancro de pulmón ou mama, senón que cada tumor ten o seu nome e apelidos. Niso consiste a medicina de precisión, de facer un tratamento con terapias tradicionais ou innovadoras á medida de cada enfermo. Ante a dúbida, o Sergas contará dende esta semana cun comité molecular de tumores.
"Vai permitir que os expertos que temos en Galicia nesa materia, ante casos dubidosos, poidan opinar de xeito conxunto cal é a mellor alternativa para un doente de cancro", explicou Julio Garía Comesaña, conselleiro de Sanidade.
O presidente da Xunta presentou hoxe a Estratexia Galega de Oncoloxía de Precisión. Alfonso Rueda defendeu que a Xunta seguirá priorizando os investimentos en Sanidade.
"O investimento en Sanidade sempre é rendible. Agora que estamos elaborando os orzamentos, a Sanidade será, sen dúbida, o gasto fundamental, dende o coidado dos profesionais ata dispor dos mellores equipos tecnolóxicos", afirmou Rueda.
O obxectivo da estratexia de oncoloxía de precisión é reducir o impacto do cancro na poboación galega e que todos os galegos teñan acceso aos mesmos sistemas de diagnóstico e tratamento dirixido, vivan onde vivan.
