O Supremo confirma o procesamento de Puigdemont por malversación e desobediencia

O Tribunal Supremo confirmou o procesamento do expresident catalán Carles Puigdemont por malversación agravada e desobediencia, tras a reforma do Código Penal impulsada polo Goberno, que derrogou a sedición.

A Sala de Apelación do alto tribunal rexeitou os recursos de Puigdemont e dos exconsellers Antonio Comín, Clara Ponsatí e Lluis Puig contra a decisión de manter o seu procesamento, acordada polo maxistrado Pablo Llarena.

E fixo o mesmo co recurso de Vox, que exerce a acusación popular, que pedía engadir o delito de desordes públicas agravadas en substitución do delito de sedición, derrogado pola reforma, por entender que os elementos de ambos os tipos penais son distintos.

"Os procesados despregaron e impulsaron unha desobediencia civil e unha insurrección institucional orientada a alterar a orde constitucional, sen ningunha chamada á violencia, non unhas desordes públicas por medio da violencia", di a Sala.

Os maxistrados seguen así a liña fixada polo tribunal que xulgou os líderes independentistas, que hai uns meses rexeitou cualificar os feitos como desordes públicas e explicou que a reforma da malversación non altera o procesamento por este delito nin cabe incluír os feitos nos novos subtipos atenuados fixados, que se cometen cando non existe ánimo de lucro.

Na vista de apelación, a defensa do expresident pediu anular as ordes nacionais de detención e revogar o procesamento de Puigdemont e dos exconsellers para "que se adapte o procedemento á realidade xestada polo poder executivo e lexislativo", porque "ningún é responsable do desaguisado dunha reforma penal deplorable".

Na súa opinión, o auto de procesamento quedara "desfasado" e obsoleto debido ao "transcurso do tempo e algúns feitos" tales como a sentenza do procés e a reforma penal que derroga a sedición e modifica o delito de malversación, que situou este procedemento "nun escenario de envurullo procesual".

Pero a Fiscalía respondeu que o único que pretendían os rebeldes é "enlear máis procesualmente o asunto para seguir presentando novas batallas" nos tribunais cando "todo este atoamento procesual non foi obra do tribunal, nin da Fiscalía nin da Avogacía, foi obra dos recorrentes".