O xuíz abre dilixencias por 13 homicidios imprudentes no incendio das discotecas de Murcia

O Xulgado de Instrución número 3 de Murcia abriu dilixencias por trece homicidios imprudentes nos incendios ocorridos na madrugada do domingo nas discotecas da zona Atalayas da capital murciana, en que morreron outras tantas persoas e 24 quedaron feridas.

O Tribunal Superior de Xustiza de Murcia informou este martes da apertura das dilixencias, que se manteñen secretas para o esclarecemento dos feitos e a depuración, no seu caso, de eventuais responsabilidades penais.

Os equipos forenses despregados desde o momento da traxedia terminaron as autopsias e estase á espera de que se completen os traballos de identificación.

Os cadáveres das vítimas estaban nunha área de 20 metros cadrados

Os cadáveres das trece vítimas do incendio foron atopados nun espazo de vinte metros cadrados da primeira planta da discoteca Fonda Milagros; catro deles, nos aseos, onde deberon refuxiarse do lume; sete máis, en dous grupos ao longo do corredor do reservado, e dous máis, entre os entullos da zona de aseos.

Así o explicou o portavoz dos bombeiros de Murcia, Juan Ángel Navidad, que engadiu que os edificios afectados se atopan en moi mal estado, polo que terá que ser agora o Concello o que decida se os declara en ruína para a súa posible demolición.

Segundo Navidad, cando chegaron oito minutos despois da chamada de alerta do teléfono único de emerxencias atopáronse xa moi desenvolto o lume con fume en todas as naves, incluída a discoteca Golden e o concesionario de coches anexo a Fonda Milagros.

Comentou que as discotecas Teatre e Fonda Milagros poderían compartir máquinas de climatización, pero descoñécese se tiñan os mesmos condutos, algo que terá que dilucidar a empresa de mantemento ou o propietario dado o estado no que quedaron ambos os locais.

Ao seu xuízo, a policía científica necesitará un tempo importante en tomar todas as mostras necesarias para a súa investigación de modo que poida elaborar unha conclusión do que puido ocorrer esa madrugada.

De forma paralela ao traballo dos bombeiros, drons da Policía Nacional realizaron na mañá deste martes a planimetría das discotecas incendiadas mentres que axentes da Policía Científica están a tomar mostras e realizando fotos e vídeos dos locais que arderon. Segundo fontes policiais, a Policía Xudicial xa recolleu todas as mostras de ADN dos familiares dos oito falecidos que non puideron ser identificados mediante impresión dactilar, e continúa tomando declaracións a todas aquelas persoas que estiveron esa noite nas discotecas afectadas.