A familia de Déborah pide un acareo entre os peritos polo exame do ordenador

Os avogados da familia de Déborah van pedir no xulgado de Tui unha pericial contraditoria entre os tres peritos que analizaron o ordenador da moza. Unha especie de acareo entre os tres, diante da maxistrada.

Fano tras o informe da Garda Civil que, malia a súa ambigüidade, conclúe que o ordenador non foi manipulado. Os técnicos que elaboraron o informe non accederon ao disco duro do dispositivo, segundo apuntou este sábado o avogado da familia.

Ramón Pérez Amoedo tamén apunta que hai un 33 % de posibilidades, segundo a súa estimación, de que o dispositivo fose manipulado cando estaba custodiado pola Garda Civil.

O vindeiro xoves prestará declaración telemática o perito forense Aitor Curiel, que fixo un duro informe que confirma que a morte de Déborah foi un asasinato, o que ratificaría a etioloxía homicida que se volvía cuestionar o mes pasado.

Os avogados da familia non desbotan que o imputado ou a xuíza volvan pedir un contrainforme seguindo a dinámica do caso.

Ramón Pérez Amoedo sempre apostou porque se investigasen en dúas pezas separadas a morte da moza, e a suposta perda ou manipulación de probas. Ás veces dálles a sensación de que neste proceso se está a facer tempo ou a facer un lavado de conciencia.