Os bombeiros tardan catro horas en sufocar as lapas dun incendio nun alboio en Catoira

Incendio na parroquia de Dimo, en Catoira. Os bombeiros tardaron case catro horas en sufocar as lapas que arrasaron un alboio próximo a unha casa. A vivenda non sufriu danos e os donos tampouco tiveron que ser atendidos.

No interior do pendello había abondoso material inflamable e madeira, polo que houbo momentos en que os equipos de extinción se enfrontaron a unhas lapas con moita forza. Entre o almacenado había unha caixa dun camión isotermo que quedou calcinada.

Na extinción participaron as dotacións de bombeiros de Vilagarcía e Ribadumia, o GES de Padrón, Protección Civil de Catoira e a Garda Civil, que investiga a orixe do lume.