Os cardiólogos recomendan que as mulleres revisen o corazón a partir dos 45 anos

Saímos á rúa e preguntamos se os infartos provocan máis mortes nos homes ou nas mulleres.

"Ao mellor, os homes".

 "Eu penso que os homes".

"Homes".

 "Pois eu penso que os homes".

Esta é unha percepción que teñen case o 80 % dos españois, pero é de todo errónea.

 "No noso país as mulleres morren máis que os homes por infarto de miocardio, iso sen dúbida", responde con contundencia Mila Pedreira, cardióloga e coordinadora da Unidade Cardiovascular na Muller no CHUS

De feito, é a principal causa de morte nas mulleres no mundo occidental. É por iso que a partir dos 45 anos os cardiólogos recomendan facer revisións de corazón de xeito periódico.

 "Paréceme moi ben, si, si, si".

 "Todo o que sexa previr...".

 "Apuntaríame de cabeza", opinan varias mulleres.

A etapa máis perigosa é a partir da menopausa, que é cando a produción de estróxenos baixa e deixan de protexer as arterias. A utilización da tecnoloxía 3D a través de ecografías vasculares axuda a atinar os diagnósticos, pero son eficaces os métodos convencionais.

 "Unha revisión onde se considere unha analítica cun perfil de colesterol, de glicosa, de tensión arterial, son 4 cousas que poden alertar e poden facer que cambies o estilo de vida para mellor e pódese prever e previr esa situación de risco", explica a cardióloga.

A diabetes xestacional, o parto prematuro ou o nacemento de bebés con pouco peso están relacionados con futuros problemas cardiovasculares. As mulleres tenden a minimizar os seus síntomas, pero xa é hora de que tomen conciencia.

 "É o momento tamén de que a muller pense un pouco máis en si mesma, mire a súa saúde, cambie o estilo de vida para ben e atenda a súa situación de saúde para evitar precisamente problemas futuros", apunta Mila Pedreira, cardióloga e coordinadora da Unidade Cardiovascular na Muller no CHUS.