Os concellos que beben do Tambre descartan cortes de auga polo momento

Os concellos da área de Santiago e arredores manteñen a situación de alerta previa pola seca. Descartan calquera tipo de restrición da subministración de auga polo momento.

Vinte e un concellos que se nutren das augas do río Tambre ou os seus afluentes reuníronse esta mañá con Augas de Galicia para poñer en común a situación da captación de auga de cada un deles e coordinalo todo para unha mellor repartición dos recursos, como así nos dixo hoxe Gonzalo Mosqueira, xerente do organismo da Xunta.

Dende o Concello de Santiago por exemplo Mila Castro, concelleira de Medio Ambiente, confirmounos que polo de agora, aínda que non chova, a subministración aguantaría sen cortes catro semanas máis.

A primeira medida, se non chove ata daquela, sería a de reducir a presión da traída e comezaría de verdade a preocupación polo abastecemento de auga a Santiago e comarca.