Os cultivos afectados en Valencia ascenden xa a algo máis de 25.000 hectáreas

O Consorcio de Compensación de Seguros recibiu ata este sábado case 150.000 solicitudes de indemnización polos danos en vivendas e coches, das que 48.003 reclamacións corresponden a casas e case 90.000 a vehículos. Outras case 9.000 corresponden aos estragos en comercios e almacéns.

"Teño unha tenda de 400 metros cadrados e perdino todo, isto é unha ruína e son autónoma. As axudas son moi poucas e do Consorcio non sei cando nos darán algo", di unha das afectadas.

Sobre as perdas no agro, actualmente traballan sobre o terreo uns 40 peritos agrícolas. O dispositivo verase reforzado a partir do luns con outros 30 profesionais. 

Os cultivos afectados ascenden xa a algo máis de 25.000 hectáreas, principalmente de cítricos, caqui, hortalizas e viñedos.

Segundo datos da entidade de seguros agrarios combinados Agroseguro, hai 10.000 agricultores afectados en 50.000 parcelas e con 650 millóns de quilos de produción danados.

O capital asegurado nestas zonas é de 250 millóns de euros, pero os expertos aínda non fixeron un balance provisional das indemnizacións previstas.

Debido á difícil situación que aínda se está a vivir, na provincia de Valencia, polo momento so recibiron arredor dun terzo dos partes de sinistro.