Os gardas civís de Barbate non poden identificar os atacantes da narcolancha

Os catro gardas civís que sobreviviron ao ataque dunha narcolancha no porto de Barbate (Cádiz) o 9 de febreiro, en que morreron dous axentes, confirmaron perante un xulgado da localidade que foi unha acción intencionada e declararon que non puideron identificar os seus tripulantes.

Ata os xulgados chegaban tres dos sobreviventes á embestida da narcolancha, o cuarto prestou declaración vía telemática. Unha declaración moi difícil para eles que os obrigou a revivir o sucedido aquela noite en que faleceron dos compañeiros.  

Na súa declaración os catro coincidiron en cal das narcolanchas os atacou tamén en que non había posibilidade de escapar e que a intención era clara. 

Ante o Xulgado de Primeira Instancia e Instrución 1 de Barbate detallaron que houbo varios intentos de ataque por parte dunha narcolancha, a de maior tamaño das que se atopaban no porto, entre eles, dúas arremetidas graves e a terceira mortal, segundo declarou aos xornalistas o avogado dunha das acusacións, Andrés Carreño.

Este avogado sinalou que os axentes, que se atopan afectados polo ocorrido, dixeron á xuíza que, dadas as circunstancias en que se produciron os feitos, non puideron ofrecer máis detalles dos tripulantes da narcolancha, aínda que lembran unha persoa cunha peza "máis brillante ou rechamante", de cor laranxa ou avermellada.

Estas declaracións prodúcense despois de que se coñeza o novo informe da Unidade Central Operativa (UCO) que descarta a participación dos seis encarcerados pola morte de dous gardas civís.

Os avogados deses seis detidos reiteraron perante o xulgado de Barbate a petición de posta en liberdade dos detidos que permanecen en prisión provisional.