Os Reis Magos enchen Galicia de agasallos para todos os gustos

Despois de portarse ben todo un ano, ou case, esta mañá os máis pequenos da casa espertaban coma nunca: as súas maxestades cumprían coa súa cita anual e deixaban unha morea de agasallos.

Entre carpetas de Pikachu, mochilas novas e unhas botas de baloncesto, a cara da rapazada iluminábase por momentos.

Non faltaron os obsequios de toda a vida, eses que segundo pais e nais é cousa das súas maxestades, coma "un chándal dos maiores", nin tampouco os que cada ano marcan tendencia e que nunca están dispoñibles nas tendas.

Pero se teñen tempo, os Reis Magos tamén deixan detalles persoais, como algunha sinatura nun libro; mais se van con présa, porque a noite pasa rápido, deixan aos máis pequenos que se organicen entre eles, mesmo repartindo os agasallos.

Este ano semella que as súas Maxestades foron moi xenerosas e a rapazada amosábase moi emocionada contando o abano de agasallos recibidos.

Dende "unha boneca Rainbow High, unha Barbie e unha ruleta de texturas", que conta algún dos rapaces agasallados ata un xogo de "peixes aos que lles tes que meter unha boliña pola boca e que se pechan".

Cos Reis Magos descansando por fin, xa só queda desfrutar dos regalos e portarse ben, para que o ano que vén sexan aínda mellores.

Agasallos na rúa

Aínda que os Reis Magos deixaron moitos xoguetes de interior, nalgunha casa apareceron bicicletas, patíns, balóns e outros "artefactos" que había que estrear fóra.

Os parques e pistas deportivas de toda Galicia foron este sábado os mellores espazos para experimentar cos xoguetes novos, sobre todo, se tiñan dúas rodas.