Os sindicatos de Ryanair anuncian doce días máis de folga no mes de xullo
Os sindicatos de Ryanair anuncian doce días máis de folga no mes de xullo
Convocan paros para o 12, 13, 14, 15, 18, 19, 20, 21, 25, 26, 27 e 28
En Santiago, a conexión a Marsella non saíu e houbo atrasos en varios voos
Os sindicatos de Ryanair convocaron doce xornadas máis de folga para tripulantes de cabina durante o mes de xullo, tras as seis que levaron a cabo e finalizaban este sábado.
Nun comunicado, os sindicatos convocantes (USO e Sitcpla) anuncian novos paros para os días 12, 13, 14, 15, 18, 19, 20, 21, 25, 26, 27 e 28 de xullo nos dez aeroportos españois nos que opera a compañía.
Reclaman "un cambio de actitude" para que a empresa volva retomar a negociación dun convenio colectivo "que recolla unhas condicións laborais dignas e baixo a lexislación española para os seus traballadores".
Esíxenlle ao Goberno e, concretamente, á ministra de Traballo e Economía Social, Yolanda Díaz, "que non permita que Ryanair vulnere a lexislación laboral e dereitos constitucionais como o dereito á folga".
"Que actúe contra unha empresa que non acata as sentenzas xudiciais, non cumpre coa lei e utiliza o medo, a coacción e a ameaza cos seus empregados".
En toda España este sábado canceláronse 16 voos por mor da folga de Ryanair e outros 9 polo paro en EASYJET. Amais, preto de 200 conexións sufriron atrasos.
Un total de 215 voos cancelados e máis de 1.200 atrasos é o balance que fan os sindicatos das seis xornadas de folga que lles tocou capear aos pasaxeiros en plena operación saída das vacacións do verán.
![](https://img-g24-crtvg.flumotion.com/prog24/2022/20220702/ENGBRFOLGARYANAIREASYJET_frame_41373.png)
Consecuencias en Galicia
Fernando viuse obrigado a alargar as vacacións en Galicia a causa da folga de Ryanair. Canceláronlle o voo do xoves a Palma de Mallorca hoxe intenta de novo chegar á casa.
"Rematabámolas antonte, pero quedei en terra porque Ryanair cancelou o voo. Agora, dous días máis tarde, pillei con Vueling a ver se podo ir a casa", conta.
Pagou 225 euros polos novos billetes e perdeu dúas xornadas de traballo pero marcha de Santiago sen que a aeroliña lle acepte unha reclamación.
"Só recollen as reclamacións online pero eu intenteino varias veces e non hai maneira de facelo, así que presentareina a través da Axencia Estatal de Seguridade Aérea", asegura.
Moira tamén quedou en terra o venres. Este sábado confía en chegar a Málaga sen problema.
"A solución foi reprogramarme un para hoxe e pasei a noite nun hotel pagado pola aeroliña Ryanair", explica.
Atrasos e cancelacións
No aeroporto de Santiago a saída dos voos a Milán e a Málaga atrasaron máis dunha hora e a demora da conexión con Tenerife superou a media hora. Por mor da folga, Ryanair cancelou o voo a Marsella.