Os trens turísticos de Galicia ofrecen dez rutas distintas ao longo do verán

Ás nove da mañá chegou á estación de tren de Betanzos, procedente da Coruña, o primeiro tren da Ruta das Mariñas da temporada. A zona vella desta capital do antigo Reino de Galicia é o punto de inicio dun día turístico para os seus 76 viaxeiros.

"É a primeira excursión que facemos co tren turístico e realmente estou moi apaixonado de coñecer un pouco a historia de Galicia", dicía un dos visitantes.

"Gústame por non conducir. Alugar un coche e ter que aparcalo, sábeme mal; e prefiro facelo con guía porque sempre te axuda a coñecer máis", opinaba outro.

Os viaxeiros ían parar logo en Paderne, nas únicas plantacións de té de Europa; pasear por Pontedeume; gozar da Ría de Ferrol en barco; e percorrer o centro histórico ferrolán. Aínda que para chegar a algúns dos puntos hai que botar man do autobús, o tren é o fío condutor destas rutas e ofrece unha perspectiva diferente.

"Por exemplo nesta ruta das Mariñas é moi bonito o percorrido porque pasamos case todo o tempo bordeando a ría da Coruña, a ría de Betanzos, a ría de Ferrol e as vistas son moi chulas", explicaba o guía Joaquín Fernández Travieso.

Os participantes destacan o variado da viaxe, o valor cultural e o prezo entre as bondades da experiencia.

 "Diverso porque temos o tren, temos o bus, as camiñadas para facer os percorridos", puntualizaba unha muller.

"Aínda que sexas de aquí, a non ser que sexas de aquí mesmo, non sabes quen fixo a arquitectura nin nada, e daquela vas aprendendo. Destas cousas apréndese", aseguraba un home.

"E á parte que o prezo está tamén moi interesante, porque pasar todo o día por aí por 45 € e que te leven e te traian", afirmaba outra muller. 

Esta ruta volverá saír o 17 de agosto pero ao longo do verán van estar en marcha outras dez rutas diferentes para descubrir desde faros e acantilados, ata pazos e mosteiros ou para gozar da gastronomía galega, sempre co tren como nexo da viaxe.