Os veciños de Recimil, en Lugo, dispostos a levar ADIF ao Xulgado

Veciños das parroquias de Recimil e Coeo din estar “indignados” coa actitude dos técnicos de ADIF en relación cos informes emitidos sobre o paso a nivel en que se produciu o accidente mortal que lles custou a vida a dous mozos de León e deixou outro ferido de gravidade.

Roberto López, un gandeiro que vive nesta zona do concello de Lugo, dixo a EFE que se están “falsificando os informes” que chegaron á Subdelegación do Goberno, porque neles se fixo constar que operarios de ADIF taparon de madrugada os buracos que se produciron no paso a nivel “por mor do accidente”, cando en realidade esas fochas “estaban aí desde había dous meses”.

Dixo que os veciños da zona están “todos a un tempo” e dispostos “a chegar ata o final”. De feito, afirmou que “este asunto vai acabar no xulgado” e alí, en sede xudicial, os “técnicos ou os responsables de ADIF” terán que dar explicacións sobre o sucedido e o estado en que se atopa ese paso a nivel.

Os veciños tiñan previsto empezar a cortar este mércores a vía do tren, durante unha hora ao mediodía, de dúas a tres, á altura do paso a nivel de Recimil, para reclamar máis seguridade para os usuarios mediante a colocación dun semáforo.

Con todo, finalmente, esa forma de protesta non foi autorizada, de modo que os veciños concentráronse no lugar, pero fóra da zona de protección da vía.