Abegondo conta cun novo millonario: gañou 15 millóns na Lotería Nacional

Desde hai uns días, Abegondo conta cun novo millonario. gañou 15 millóns de euros nun primeiro premio da Lotería Nacional. O 9.098 foi o número agraciado. "Eu se o tivese non estaba aquí. Marcharía de vacacións", di un veciño.

Vendérono na administración de loterías de San Marcos que, polo momento, non coñece a identidade do novo millonario. "Aínda non. Especúlase algo, pero non se sabe", di José Antonio Fariña García, o loteiro de Abegondo.

Porén hai quen ten claro que faría cos cartos. "Iría de viaxe, pero só co billete de ida. Gozar e pasalo ben", comenta outra veciña.

E isto é o que farán algúns veciños das parroquias de Sarandóns e Visantoña porque neses dous lugares choveulles un total de 3 millóns 250.000 euros. Alí venderon 25 boletos premiados con 130.000 euros cada un deles.

Esta mañá eran moitos os que se achegaban a esta administración para probar sorte, porque este non é o primeiro premio importante que reparte.

"Déramos dous gordos pola semana hai xa tempo e tamén un quinto no Nadal", explica José Antonio Fariña.

Agora, tras esta chuvia de millóns, en Abegondo todos teñen en mente xa o sorteo do Nadal por se a deusa Fortuna se volve deter aquí.