Preocupación no sector do transporte pola redución á metade da bonificación no combustible
Preocupación no sector do transporte pola redución á metade da bonificación no combustible
O combustible cústalles un 30 por cento máis ca hai un ano
Comeza a semana laboral para o sector do transporte cunha novidade importante como é a redución á metade da bonificación no carburante, que pasa dos 20 aos 10 céntimos por litro durante os próximos tres meses.
O recibo por encher o depósito dun camión, e falamos de moitos litros, é máis caro dende este sábado. O Goberno fixo oídos xordos á reclamación dos transportistas para ampliar, polo menos outros tres meses, o desconto de 20 céntimos.
O sector séntese moi prexudicado. José Fernández, presidente de Tradime Lugo, di que entenden que a situación non está agora para reducir a bonificación. Un camioneiro cóntanos que haberá que ver como evolucionan as cousas porque agora a cousa no sector "está moi complicada".
Complicado porque o combustible cústalles un 30 por cento máis ca hai un ano, pero complicada tamén polo incremento xeneralizado dos custos.
Quéixanse tamén polo atraso nos aboamentos das bonificacións.
