Preocupación nun barrio de Lugo pola aparición de pólas atravesadas nas portas

A aparición duns ramallos atravesados nas portas das casas está a ser motivo de preocupación para a veciñanza do barrio lugués de Marqués de Ombreiro.

Os residentes, que procuran retiralos, sospeitan que se trata dunha artimaña para comprobar se o inmoble está baleiro antes de ocupalo de xeito ilegal.

Cren que os usurpadores de vivendas deixan as pólas nas portas para volver días máis tarde e ver que foi delas. É dicir, se xa non están, todo segue igual, pero se permanecen intactas, significa vía libre para entrar e poder así asentarse nelas.

Os veciños da mesma avenida xa denunciaran hai días o intento de ocupación irregular dunha casa. Tras alertar o 091, tres patrullas policiais acudiron ao lugar e desaloxaron o inmoble.

Tocante aos ramallos nas portas, a policía abriu unha investigación para comprobar se as sospeitas veciñais están fundadas.