Programa Talentos: a ONCE fomenta a contratación de persoas con discapacidade nas empresas galegas

Oitocentas trinta e unha persoas con discapacidade conseguiron traballo o ano pasado en Galicia grazas á Fundación ONCE.

Un dos instrumentos é o programa Talentos, cun obxectivo: que as empresas coñezan e recoñezan a súa valía e o seu afán de superación.

Nese marco, Ourense recibiu un dos que máis sabe de superarse: o avogado e campión de tenis sobre rodas Cisco García.

Unha mala caída practicando deporte na neve en 2015 rematou para o cordobés Cisco García cunha paraplexia que lle inutilizou as pernas. Veu contar a súa historia a Ourense dentro do prograna Talentos da ONCE, e como a superou, por se a alguén lle serve a súa experiencia pero tamén para que as empresas se decaten de que malia estar en cadeira de rodas, a persoa segue sendo a mesma.

"Poden realizar o traballo igual de ben ca outra persoa, polo menos que non descarten cando aparece alguén con discapacidade que xa poñan o non, senón: imos escoitalo, imos ver o seu pasado, a súa preparación e competencias porque pode achegar moitísimo" cóntanos o propio Cisco García.

Tamén falou do seu libro Irrompible, editado no 2021, que vai pola sétima edición.

"Conta a miña filosofía de vida, un pouco a miña historia e cousas que a min me axudaron no día a día. E se con isto podemos axudar a xente cos seus problemas cotiáns, pois moi contento. A vida na cadeira é menos dura do que eu pensaba antes. Vida plena, podes facer mil cousas, seguir viaxando, vivindo só, facendo todo o que queiras. Apertando máis os dentes, non o neguemos, pero podes".

Casado tras o accidente e con dous fillos, a súa ilusión actual é prepararse ao máximo para as Olimpíadas de París do ano que vén. Outra forma de darlle visibilidade ao talento das persoas con discapacidade para fomentar a súa contratación.