Reabre tras máis dun ano a circulación da ponte de Santa Marta, en Ponte Arnelas
Reabre tras máis dun ano a circulación da ponte de Santa Marta, en Ponte Arnelas
Recupérase a comunicación que une Ribadumia e Vilanova de Arousa e tamén o paso peonil sobre o río Umia polo que transcorre o Camiño de Santiago
O tráfico estivo cortado polas obras de reconstrución da infraestrutura, na que se produciran desprendementos pola corrosión
Desde este xoves xa se pode circular pola ponte de Santa Marta, en Ponte Arnelas. Estivo cortado o tráfico algo máis dun ano polas obras de reconstrución acometidas nesta infraestrutura, onde se produciran desprendementos por mor da corrosión.
Recupérase así a comunicación pola estrada que une Ribadumia e Vilanova de Arousa e tamén o paso peonil sobre o río Umia polo que transcorre o Camiño de Santiago.
Este mércores os últimos condutores empregaron en Ponte Arnelas o desvío provisional habilitado mentres duraron as obras acometidas na infraestrutura. A súa reapertura ao tráfico recupera a conexión entre os concellos de Ribadumia e de Vilanova de Arousa.
Tamén os peregrinos recuperarán o paso do Camiño sobre o río Umia na senda peonil que transcorre baixo a ponte.
Senda peonil baixo a estrada da ponte
A ponte de Santa Marta tivo que ser reconstruída. Os afundimentos que a oxidación provocara na estrada esixiron unha actuación integral.
O Goberno galego investiu algo mais de cinco millóns de euros na reconstrución da ponte.
