Os veciños de Pantón reinvisten os cartos do monte veciñal en proxectos para darlle vida á aldea

Coa idea de atraer poboación nova os comuneiros de Tuiriz, en Pantón, decidiron acondicionar a cantina da vella reitoral para poñela en alugueiro en condicións moi vantaxosas. Xa non queda ningún bar nesta parroquia, que chegou ter catro e máis de 400 veciños.

Ademais, con vistas ao turismo, pensan xa en rehabilitar a vella reitoral, que compraron tamén cos cartos da comunidade. É tan só unha das iniciativas que promoven para fixar poboación nunha zona moi avellentada e para atraer novos veciños, con bos resultados.

Por recuperar, os membros da comunidade de montes de Tuiriz decidiron recuperar tamén algunhas tradicións. Se a pandemia non o impide, esta parroquia de Pantón acollerá de novo este ano a súa Festa da Malla.