Remata a identificación dos restos mortais dos 10 falecidos no incendio de Valencia
Remata a identificación dos restos mortais dos 10 falecidos no incendio de Valencia
O xulgado autorizou a entrada dos veciños ás vivendas para recuperar aqueles útiles que se puideran salvar
A investigación forense completou a identificación das 10 vítimas mortais, o que permitirá aos familiares facerse cargo dos corpos. O xulgado de instrución autorizou, ademais, a entrada dos veciños ás vivendas para recuperar aqueles útiles que se puideran salvar. Ata o de agora tiñan que conformarse co que os bombeiros ían sacando e entregando.
No medio da desgraza, calquera pequena pertenza, sobre todo se ten valor sentimental, proporciona un momento de alegría.
O Goberno valenciano aprobou onte a partida de 4 millóns en axudas directas. Inclúen unha achega de entre 6.000 e 10.000 euros para necesidades básicas e outra axuda de ata 1.500 euros ao mes para alugueiro.
O presidente da Generalitat Valenciana, Carlos Mazón, di que as medidas son urxentes porque a desaparición dunha vivenda "crea un problema económico pero tamén supón a perda de lembranzas e proxectos de vida"
O rei Filipe VI, que viaxou á cidade acompañado da raíña, reuniuse en privado coas vítimas e agradeceu aos corpos de emerxencia o labor desenvolvido. Todos vimos a través dos medios o complicado que foi este incendio, o inusual e extraordinariamente violento. Vostedes deron un exemplo á sociedade, a Valencia e a toda España", díxolles.
A situación das vítimas foi tamén asunto a tratar no Consello de Ministros, que acordou pór en marcha todos os recursos para axilizar os trámites que dependan da Administración Xeral do Estado.
A ministra portavoz, Pilar Alegría, confirmou que o Consello de Ministros deu orde de axilizar todos os trámites que dependan da Administración Xeral do Estado e vanse establecer unidades especiais para a expedición de documentación e certificación das propiedades.
Continua a investigación das causas do incendio. Un curtocircuíto é unha das teorías máis plausibles, xa que non había ninguén no piso en que se orixinou o lume. Mentres medra a preocupación ante a existencia en Valencia e España de outros edificios cos mesmos materiais construtivos.
