Renfe ofreceu arredor de 20.000 prazas de tren máis esta fin de semana
Renfe ofreceu arredor de 20.000 prazas de tren máis esta fin de semana
En total puxo á venda medio millón de prazas no conxunto de España
A maioría dos viaxeiros cos que falamos na estación de tren da Coruña despedíanse das vacacións e emprendían a volta á rutina.
"Levamos varios días viaxando por diferentes sitios de Galicia e esta foi a última parada e xa volvemos á nosa cidade, Barcelona. Acabáronse as vacacións", explica unha moza.
"Acabáronse. Hai que ir traballar", lamenta un home.
"Estudo en Salamanca e vou de volta aos estudos, ás clases", conta unha rapaza.
"Eu estou xubilado e estou de vacacións sempre, non teño problema, pero aquí estiven moi ben, con moi bo tempo. Cuberto, pero A Coruña está máis bonita con algo de nubes", asegura un viaxeiro.
"En Madrid estabamos con preto de 40 graos todos os días e viñemos aquí e foi un pracer", apunta outro.
"Viñemos coidar o neto e agora de retorno á casa. Os fillos tiñan unha voda e chamáronos para coidar o neto. Non foron vacacións, foi traballo dabondo, pero encantados", afirma unha parella.
